Panthankot-ah Kathua pawngsual thubuai sawn

Surpeme Court chuan Jammu and Kashmir-a Kathua district-a hmeichhe naupang pawngsual rawn leh thah thubuai chu Punjab-a Pathankot-a ngaihtuah turin a sawn.

Chief Justice Dipak Misra kaihhruai bench chuan Kathua pawngsual thubuai, Jammu and Kashmir pawn lama sawn tura ngenna chu Thawhṭanni khan ngaihtuahin Pathankot-a ngaihtuah tur hian a ti a, he thubuai Central Bureau of Investigation (CBI) chhuitir tura ngenna erawh chu a hnawl thung. SC chuan he thubuai hi state police-ten chhuiin, chargesheet pawh an thehlut tawh a, hei vang hian CBI kuta hlan kher a ngai lo niin a sawi.

Supreme Court chuan Jammu and Kashmir-a hman, Ranbir Penal Code hmangin Pathankot-ah Kathua pawngsual thubuai hi ngaihtuah chhunzawm a ni dawn tih a sawi. He thubuai hi pawngsual tawktu leh pawikhawihtua puhte tan pawh dik taka ngaihtuah a nih tur thu a sawi bawk. Hemi rual hian pawngsual tawktu chhungte leh an ukil chu venhimna pe chhunzawm turin a ti a, statement leh record-te chu Urdu aṭanga English-a let turin a ti bawk.

Jammu and Kashmir sorkar chuan he thubuaiah hian special public prosecutor a ruat thei ang tiin SC chuan a sawi a, thuhretute a hun taka an inlan theihna turin sorkar chuan hma a la tur a ni, a ti. He thubuai chungchangah hian media mite chu an ka hupsak an ni tur a ni lo, a ti bawk.

Hetih lai hian J&K sorkar chuan state chhungah rorelna dik taka kalpui theih a ni tih sawiin, state pawn lama thubuai sawnchhuah chu a duh loh thu a lo thlen tawh a ni.

Kathua pawngsual thubuai hi state police hnuaia Crime Branch-ten an chhui a, kar hmasa khan mi pasarih lakah chargesheet siamin, kum tlinglo pakhat lakah a hranin chargesheet siam a ni bawk. Chargesheet an thehluhah hian hmeichhe naupang kum riat mi hi rukbo a nih thu leh, damdawi-a hrai ruiin temple chhungah hren beh a, pawngsual rawn a nih hnua thah a nih dante kimchang takin an tarlang bawk a ni.