Japan-in hmarchhak hmasawnna turin Development project invest a duh
India-a Japan Ambassador Kenji Hiramatsu chuan Thawhṭanni khan Japan-in hmarchhak hmasawnna tur development project chu India hmarchhakah invest an duh thu a sawi. A bik takin processing leh infrastructure development project lam hawi an duh tih a sawi a, hmarchhak chuan hemi kawngah hian theihna an ngah a ni, a ti. Hiramatsu hian Thawhṭanni khan Meghalaya Governor Ganga Prasad chu Shillong-ah a tlawh a ni.
Japan Ambassador chuan hmarchhaka hmasawnna thlen chu an ngaihpawimawh thu sawiin, food processing leh infrastructure development bakah sumdawnna lamah ṭhurualpui a, hmarchhaka sumdawnna kalpui turin Japan sumdawng liante pawh an hmin mek thu a sawi.
Hiramatsu chuan India rama development project an kalpui mekte chu sawichhuakin, Ahmedabad leh Mumbai inkarah pawh high speed bullet train hmasa ber tlan tir tura hma an lak mek thu a sawi. Hei hi kum 2023 chuan tlantir hman ngei an tum tih a sawi bawk.
Hmarchhak mite leh Japan miten inanna an neih thute pawh sawiin, sumdawnna mai bakah a mihring chengteah pawh inkungkaihna ṭha awm se a dih thu a sawi uar hle. Cultural exchange program-te pawh hun lo la awm turah chuan neih a beisei thu a sawi lang bawk.
Meghalaya Governor Ganga Prasad chuan state chhunga strawberry chinin hma a sawn theih nan Japan chuan strawberry planting material-te tihhmasawnna kawngah an thiamnate hmanga ṭanpui an inhuam niin a sawi ve bawk.
Ganga Prasad chuan Japan chu Shiitake Mushroom tharchhuah lamah khawvelah hmahruaitu an nih thu leh hemi kawnga Tamil Nadu Agriculture University an thawhpui ang chiah a, Meghalaya an thawhpui thei a nih chuan pa chinna kawnga nasa taka hma an sawn a beisei thu a sawi a ni.