AP: Monpa Tribe Apex Body thar Monpa Mimang Tshokpa a ding ta

Arunachal Pradesh-a West Kameng leh Tawang district-a Monpa Tribe ten hunrei tak ata tawh an duhthusam apex body neih chu Thawhṭanni khan tihhlawhtlin a ni ta a, apex body thar hi Monpa Mimang Tshokpa (MMT) tih a ni.

‘Monpa Mimang Tshokpa’ general conference hmasa ber hi Chief Minister Pema Khan­du chuan kaihruaiin district pahnih aṭang hian Mon­pa Tribe mi 500 vel an kal­khawm a, kalkhawm te hian pawl kalphung tur leh inkaihhruaina dan an duang nghal.

Pema Khandu chuan Mon­pa mipui zawng zawngin platform pakhat inṭawm an neih chu Chief Minister boral ta Dorjee Khandu leh TG Rinpoche te chuan 2009 aṭang daih tawh khan ṭul an tih tawh thu a sawi.

Chief Minister chuan Mon­pa society-te chu a lawmpui thu sawiin, MMT president atana thlan thar Rinchin Dorjee leh MMT Secretary General TT Dirkhipa leh MMT central executive committee member zawng zawngte chu an duhthusam tihhlawhtlin a nih avanga a lawmpui thu a sawi bawk.

Khandu chuan apex body din thar chuan tribe dangte nen pawha inlungrual tak leh inrem taka an awm theih nan kawngro a su dawn tih a sawi a, MTT chuan state chhunga tribal pawl dang ang thoa inremna awm theihna atana hma an lak dawn thu sawiin, inunauna kawng hawia hma an lak dawn tur thu a sawi bawk.

RWD Parliamentary Secre­tary Jambey Tashi pawhin a hmain apex body din a nih hunah chuan midangte nena inkungkaihna ṭha bakah inzir tawnna nei tura a duh thu a lo sawi tawh bawk.