Nathu La kaltalnga Kailash Mansarovar Yatra chhunzawm a ni : Sushma Swaraj

External Affairs Minister Sushma Swaraj chuan Thawhlehni khan Nathu La pass chu Kailash Mansarovar Yatra atan hawn a nih leh tawh thu a sawi.

Union Minister chuan Chinese Foreign Minister hnenah ram pahnih mipuite inkarah inlaichinna ṭha a awm a nih loh chuan sorkar pahnih inkarah inkungkaihna ṭha a awm thei lo tih a hrilh thu a sawi a, kum kaltaa Nathu La pass khar a nih chuan mipuite nasa takin a nghawng tih pawh a hrilh thu sawiin hawn leh a ni ta tih a sawi thei chu lawmawm a tih thu a sawi a ni.

Sushma Swaraj chuan biakzina kal, pilgrim 60 awmna batch 18 Lipulekh Pass-ah an tirh dawn thu leh pilgrim 50 awmna batch 10 chu Nathu La pass-ah hian an tirh dawn thu a sawi a, kumin Kailash Mansarovar Yatra-ah hian pilgrim 1580 vel an kal dawn tih a sawi bawk.

Swaraj-i chuan China-a Shanghai Coope­ration Organisation (SCO) Foreign Ministers meet hmanga a cham chhung khan China Foreign Minister pawhin Kailash Mansarovar Yatra chu a remtih thu a sawi a, Yatra hi nikum-a Doklam-a China leh India sipaite ni 72 zet an inep avang khan tihtawp a ni.

External Affairs Minister hian a hmain Kailash Mansarovar yatra hi kumin hian hawn leh a ni dawn tih a lo sawi tawh a, China lam pawhin an pawmpui ngei a beisei thu a lo sawi tawh bawk.

Yatra-a kal tur thlanna hi computerise vek a ni a, dik taka thil tih a nih theih nan random number-generation system hman a ni. KMY-a zin theih hun chhung hi thla li niin June aṭangin a in ṭan ṭhin a ni. Kumtin Yatra-ah hian India mi sang chuang an kal ṭhin a, MEA chuan heta kal tur te hi buaipuiin Lipulekh Pass (Uttarakhand) leh Nathu La Pass (Sikkim) kaltlang hian June aṭanga September inkarin yatra hi an nei ṭhin a ni.