AP: Naharlagun Railway Station-ah free WiFi dah
Arunachal Pradesh-a Naharlagun Railway Station-a free WiFi dah chu Thawhlehni khan Deputy Chief Minister, Chowna Mein chuan a tlangzarh.
Chowna Mein chuan free WiFi tlangzarh a ni chu digital connectivity lama hmasawnna kawng khat a nih thu a sawi a, Prime Minister digital India kalpuina kawngah hmasawnna kawng khat a nih thu a sawi.
Dy CM chuan BharatNet project, RailTel in a kalpui chu state sorkar pawhin a thlawp thu a sawi a, district hrang hrang, block leh gram panchayat hrang hrang te chu internet speed sang tak hmang hian thlunzawm vek tum a nih thu a sawi a, digital divide chu hei hian a tiziaawm dawn tih sawiin e-governance, e-education, e-medical, etc.-te chu ṭangkai zawka kalpui theih a ni dawn tih a sawi a ni.
Assistant Divisional Railway Manager, Santosh Kumar Sharma leh DGM RailTel, Prakash Ratray te chuan railway-a free WiFi dah chu Indian Railways in rela chuang ṭhin te zawng zawng in a thlawna internet an hman theih nana an hmalakna a nih thu an sawi a, hemi atan hian RailTel chuan hma la in ramchhung hmun hrang hrangah A1 & A category station 400 chuangah free WiFi service hi an dah tawh tih an sawi bawk.
Railway station 200 chuang zetah WiFi service hi mumal taka kalpui a nih tawh thu sawiin Google chu an technology partner a nih thu an sawi a ni.
Free WiFi hmang tur hian ‘Railwire’-ah mobile number register a ngai a, in register hnuah hian password digit li an lo thawn ang a, chumi hmang chuan WiFi hi a khawih theih tawh dawn a ni.