Tripura-a thlipui tlehah mi pakhat thi, In 1800 chhia

Tripura-a Pathianni-a thli na tak Nor’wester tleh vangin nu pakhat in nunna a chan thu leh in 1800 lai a chhiat thu official report chuan a tarlang.

State sorkar thuchhuah chuan thli tleh hi Khowai district chuan an tuar nasa ber tih sawwiin, mi 2500 zet chu hmun him lamah sawnchhuah phah an nih thu a tarlang a, sorkar in tawmhimna tur a buatsaihah sawnchhuah an nih thu an tarlang a ni.

Superintendent of police, Khowai district, Krisnendu Chakraverty chuan Chief Minister Biplap Kumar Deb pawhin chhiatna thlenna hmun district-te hi a tlawh tawh thu leh thil awmdan a enfiah pui tawh thu a sawi.

Thli tleh hian hmun hrang hrangah chhiatna a thlen nasat avangin a thil tihchhiat zat hi rang takin report an siam thei lo a ni.

Chief Minister chuan nunna chan ta chhungte hnenah hian compensation cheng nuai nga pek an nih dawn thu a sawi a, in chhia te hi a siamṭhat nan hian cheng nuai khat ṭheuh pek an ni dawn bawk tih a sawi. An chenna chhuahsan te hnenah pawh Rs 5000 pek an nih dawn thu a sawi bawk a ni.

Krisnendu Chakraverty chuan nunna chan ta hi Khowai district-a Shanital thingtlang khuaa cheng a nih thu leh kum 60 mi a nih tawh thu a sawi a, ṭek in a deng niin a sawi.

Official-te chuan Pathianni zana thlipui tleh hi 80 kmph-a chaka a tleh thu sawiin Thawhlehni zingah pawh khan a tleh leh niin an sawi.

Khowai mai bakah Dhalai, Gomati, Unakoti, Sipahijala leh South Tripura district hmun ṭhenkhat pawh thli hian a nuai bawk a, hei vang hian state chhung hmun hrang hrangah relief camp siam a nih thu official-te chuan an sawi bawk.