Assam Congress hruaituin Gauhati High Court-ah PIL thehlut

Assam assembly-a leader of opposition, Congress MLA Debabrata Saikia chuan state sorkarin sorkar rama awm a hnawhchhuahte puala rehabilita­tion siam phutin Gauhati High Court-ah public interest litigation (PIL) a thehlut.

Assam-a BJP kaihhruai sorkarin eviction drive a kalpuinaah, Sep­tember 23 khan Darrang district-a Sipajhar revenue circle huam chhunga awmte chu chhuahtir an ni a, heng mite leh security force-te inkarah buaina chhuakin police-te silai hmehpuahah mi pahnih an thi a, mi dang 20 in hliam an tuar a ni.

Saikia chuan Sipajhar biala thil thlengte hi court enpuina hnuaiah rang taka chhui chiang turin a phut bawk.

High Court-a PIL a thehluhah, Saikia chuan sorkar hian eviction drive a neihnaah hian kaihhruaina dan siamte a zawm lo niin a sawi a, sorkar rama awmte hi hnawhchhuah an nih hma hian an harsatna tawh dan turte zirchiang a, anmahni ngei pawh inbiakna ṭha tak neihpui a, an awmna tur ngaihtuahsak leh zangnadawmna pawh a hun taka pek an ni tur a ni, a ti. Right to Fair Compensation and Transparency in Land Acquisition, Rehabilitation and Resettlement Act, 2013 chu zawm ngei a ni tur tih a sawi.

The Hindu editor leh midang lakah complain thehlut
Assam sorkarin eviction drive a neih chungchanga an thu ziah danah The Hindu editor Suresh Nambath leh ziaktu dang pahnihte lakah Pravajan Virodhi Mancha (PVM) chuan complaint an thehlut.

Latasil Police station-ah complaint an thehluhah, PVM chuan The Hindu editor bakah National University of Singa­pore-a research scholar Suraj Gogoi leh Institute of Peace and Conflict Studies, New Delhi-a senior researcher Angshuman Chowdhury-te thu ziakah chuan Assam leh Assam mipuite beihna thu tam tak a awm a ni, an ti.

Buaina chhuaka thite chung chang pawh politics thil vang niin an sawi bawk tih an tarlang. Hetianga inhuatna chawk tho thei zawnga thu an ziah avang hian an pathum lakah FIR ziaklut turin an ngen a ni.