Abonmai case : JAC-te'n nawrh titawp

Manipur-a Naga leader, Athuan Abonmai thah a nih chungchanga lungawi lohna lantira nawrh huaihawt, Joint Action Committee chuan an thil phutte state sorkarin ngaihtuah a tiam avangin an nawrh an tih tawp.

JAC hian an thil phut hrang hrangte chief minister N Biren Singh an sawipui hnuah, state sorkar nen Memorandum of Understanding (MoU) an ziak a ni. Manipur sorkar chuan Abonmai fapa upa ber chu Sub-Inspector-a dah a tiam bakah, a chhungte hnena zangnadawmna cheng nuai 10 pek a tiam bawk.

State sorkar chuan Athuan Abonmai rukbo leh thah a nih dan chu Additional chief secretary rank aia hniam lo kaihhruaina hnuaia chhui chian a remti. He commission hian thla thum chhung thil thlen dan hi an chhui chiang ang a, thla thum ral hmain an thil hmuhchhuah report kimchang chu National Investigation Agency (NIA) hnenah an thehlut ang.

Athuanmai Abonmai hriatrengna hmun siam chu sorkarin a remti bawk a, a hmun tur hi DC leh JAC-ten an sawiho dawn a ni.

Abonmai rukbo leh thahnaa inhnamhnawiha puh mi pahnih chu police-ten an man tawh a, heng mi pahnihte hi Nilaini khan Imphal West-a chief judicial magistrate court-ah hruai an ni a, court hian October 15 thleng police custody-a an awm a remti a ni.