Ramri chungchangah Assam-Meghalaya-in meeting nei dawn

Assam leh Meghalaya state ramri buaina neih mekte chinfel dan kawng zawngin October 9 hian state pahniha regional committee-te chuan meeting an nei dawn. Regional committee-te hian Thawhṭanni khan ramri buain an neih mekna hmun ṭhenkhat chu a rualin a lo tlawh tawh bawk.

Meghalaya regional committee member, Lakhmen Rymbui chuan state pahnih aiawhte hian an buaina neihna hmun zinga mi, Jaintia Hills chu an tlawh leh dawn tih a sawi. Ramri hrula awm, Umkiang khaw aiawhte chu meeting vawi hnih an neihpui tawh thu leh, an meeting-ah hian Deputy Commissioner Sniawbhlang Dhar pawh a tel thu a sawi. "October 9-a meeting kan neih turah pawh thil engkim a chiang a, buaina chinfel theih dan tur pawh kan ngaihtuah theih ngei ka beisei," a ti.