Road-Rail Bridge sei ber kumin chhungin hawng hman dawn

India rama Road-Rail Bridge sei ber tur 'Bogibeel' bridge , Assam-a Dibrugarh leh Arunachal Pradesh-a Pasighat inkara siam tur chu kumin hian peih hman tum a ni a, kumtawp lamah Prime Minister Narendra Modi chuan a hawng thei dawn niin official-te chuan an sawi.

Bogibeel project-a constructin chief engineer Mahender Singh chuan kumin July thla hian civil work chu zawh a ni dawn tih a sawi a, hemi hnu hian electrical leh signalling work atan thla hnih vel a la ngai dawn tih a sawi bawk.

Bogibeel bridge hi Indo-China border-a India sipai awmte chhawm­dawlna pek awlsam zawk nan leh thuamchakna tura ṭangkai taka hman theih beisei a ni.

He lei an dawh mek hi Asia-ah pawh a sei ber dawttu a ni dawn a, km 4.94 laia sei a ni a, lei hi a chungah three lane kawng a awm dawn a, a hnuaiah two lane kawngpui a awm bawk ang.

Lei hi Brahmaputra lui chunga dawh niin tui aṭanga metre 32-a sanga dawh a ni a, Sweden leh Denmark zawmtu lei entawn deuha siam a ni.

He lei dawh hi hmar­chhak tan chuan hma­sawnna thlentu a ni dawn tih official-te chuan an sawi a, China border-a India sipai awm te chu Tezpur aṭangin awlsam takin an mamawh te an thawn theih phah dawn niin an sawi bawk.

India leh China hian ramri km 4,000 vel zet an inṭawm a, heng zinga 75% hi chu Arunachal-ah a awm a ni.

Mahender Singh chuan tunah chuan Di­brugarh aṭanga Arunachal Pradesh kal tur hian rel pawhin km 500 vel zet kal a ngai tih a sawi a, lei hi dawh zawh a nih hunah chuan km 100 aia tamin kawng hi a tawi phad dawn tih a sawi bawk a ni.

Lei dawhna tur hi 1996 khan pawm a ni a, BJP kaihhruai NDA sorkar khan 2002 khan hna hi ṭanin Congress kaihhruai UPA sorkar khan 2007 khan national project-ah a lo pawm tawh bawk.