Sitharaman-i'n Assam-a 120 MW hydropower project lungphum a phum

Union finance minister Nirmala Sitharaman chuan Ningani khan Assam tlawhin, Dima Hasao district-a Assam Power Generation Corporation Limited-in 120 MW Lower Kopili Hydro Electric Project a thawh tur lungphum a phum. He hun hi chief minister Himanta Biswa Sarma chuan a hmanpui a ni.

Kum 2020 December thla khan sorkar laipui chuan Assam-a electricity siamchhuah tihpunna tura 120 megawatt (MW) hydroelectric power plant siamna atan hian Asian Development Bank (ADB) loan USD maktaduai 231 lakna turin inremna a lo siampui tawh a ni.

Kopili luia hydropower project hmang hian kum 2025-ah chuan electricity supply hi 469 gigawatt-hours (GWh) in a pung thei dawn a, greenhouse gas tihchhuah pawh kumtin ton 3,60,000 velin a tlem phah thei ang.

Chief Minister Sarma chuan he project hi kum 2024 June thlaa zawhfel hman tum a ni tih sawiin, he project hian state chhunga sumdawnnate tihchangtlun kawngah a puih dawn bakah, hna thawh tur pawh tam tak a siam belh dawn bawk a ni, a ti.

External aided project hrang hrang hmanga Assam an puih avangin CM chuan prime minister Narendra Modi leh Sitharaman-te chu lawmthu a hrilh nghal bawk. Project senso tur, cheng vaibelchhe 2,200 aṭangin cheng vaibelchhe 1,700 chu sorkar laipuiin a pe tih sawiin, he project aṭanga hlawkna hmuhte chu Dima Hasao bial tihhmasawnna atan hman a ni vek dawn tih a sawi.

Union Finance Minister hian Haflong Tinali-Lower Haflong inkara kawngpui, km 90-a thui cheiṭhatna tur project lungphum a phum nghal bawk. Asian Development Bank (ADB) puihna Assam Road Network Improvement Project (ARNIP) thawh tur hi state PWD chuan a pui bawk ang.

Assam sorkar flagship programme, 'Asom Mala' hnuaiah state highway (SH) leh major district roads (MEF) network chu thuamṭhat tum a ni a, ARNIP hian SH leh MDR km 313 vel chu cheiṭhat a tum a, hei bakah hian kawng km 200-ah road safety lam ṭha zawka kalpuina turin hma a la bawk.

CM chuan state sorkarin Dima Haso-a kawng siamna atan Rs vbc 900 a hman tur thu leh, Rs vbc 250 sengin thla kua chhungin Umrongso- Lanka Road siam a nih tur thu a sawi.

Sitharaman leh Sarma-te hian Brahmaputra luia Guwahati leh North Guwahati inkara lei dawh mek pawh an enfiah nghal a ni. He lei hi six lane tur niin, km 8.4 a thui a ni dawn a, Brahmaputra luia lei dawh pasarihna tur a niin, lei dawh zinga pathum hi New Development Bank-in a tum a ni. Prime minister Narendra Modi chuan he lei dawhna tur lungphum hi kum 2019, February thla khan a lo phum tawh a, nakkum August thlaa zawh hman tum a ni.