Tripura-ah political party thar a ding

Tripura Congress president hlui, Pijush Kanti Biswas chuan political party thar, Tripura Democratic Front (TDF) a din.

Indian National Congress aṭanga a ban hnuah, Biswas hian a party din thar hi Ningani khan Agartala-ah a tlangzarh. Biswas chuan zirlai a nih lai, kum 1969 aṭangin Congrss party-ah theihtawp a lo chhuah tawh tih sawiin, mahse an party lamin an ngaihthah leh intihbingna a awm avangin Congress chu a chhuahsan niin a sawi. "Rinawm takin party tan theihtawp ka chhuah a, mahse AICC chuan Tripura-a Congress hruai­tute ngennate an ngai pawimawh lo a ni. Hei vang hian Congress-a ka awm chhunzawm zel a nih chuan mipuite rawngbawl hna kan thawk thei dawn tawh lo niin ka ngai a ni," a ti.

Party thar tlangzarhna inkhawm buatsaih hian MLA hlui Tapas Dey pawh a tel. Dey hian Nilaini khan kum 58 zet a lo awm tawhna, Congress party hi party hruaitute nena an inmil loh chhoh avangin a chhuahsan a ni. TDP hi Congress hruaitu leh member eng emaw zatin an zawm nghal bawk a ni.

Pijush Kanti Biswas fapa, Youth Congress president hlui Pujan Biswas chu TDP president atan dah a ni a, executive committee member turte pawh an puang thuai dawn tih an sawi.