Sikkim-ah ED office hawng

Sikkim-ah Enforcement Directorate (ED) hawn a ni a, hei hi hmarchhak biala ED sub-zonal office palina a ni.

State khawpui Gangtok-ah ED office thar hi hawngin hna pawh an thawk ṭan nghal a ni. Office hi Deputy Director rank officer-in a enkawl a, Kolkata zonal office-II hnuaiah a awm a ni. Hmarchhaka ED sub-zonal office hi Shillong (Meghalaya), Imphal (Manipur) leh Agartala (Tripura)-ahte hawn ni tawhin, Guwahati (Assam)-ah zonal office a awm bawk a ni.

Agency chuan office la hawn lohna, hmarchhak state dang khawpuiah pawh sub-zonal office hi hawn vek an tum tih a sawi. ED hi Union finance ministry hnuaiah awmin, Prevention of Money Laundering Act (PMLA) chungchang bakah Foreign Exchange Management Act leh Fugitive Economic Offenders Act-te an buaipui deuh bik a ni.