Positivity rate 3% hnuai lam a nih hunah school hawn a ni ang : Manipur CM

Manipur chief minister N Biren Singh chuan an state-a nitin hri kai thar, daily positivity rate chu 3% hnuai lam a nih hnuah school hawn chungchang chu ngaihtuah a ni ang, a ti.

Imphal-a Sainik School function a hmanpuinaah CM chuan hei hi sawiin, tuna an state positivity rate chu 5% chung lam a la nih avangin school hawn a la hun lo tih a sawi a, state sorkar chuan hri leng khuahkhirh turin theihtawp a chhuah chhunzawm zel tih a sawi bawk.

Covid-19 vanga thi chhungte zangnadawmna pek tur chungchang chu sorkar laipui lam aṭanga thuchhuah a awm veleh pe chhuak thei nghal turin state sorkar chu a inpeih tawh tih a sawi bawk. Sorkar laipuiin Covid vanga thi chhungte Rs 50,000 pek a rawtna chu Supreme Court pawhin a pawmpui tawh a, mahse hemi chungchangah hian thuchhuah erawh siam a la ni lo.