Manipur-ah BJP President a zin

BJP national president JP Nadda chu ni hnih cham turin Inrinni khan Manipur a thleng.

JP Nadda hi Manipur chief minister N Biren Singh leh party hruaitu hrang hrangten airport-ah an lo hmuak a ni. Nadda hi nakkum kumtir lama Manipur assembly inthlan neih tura an party dinhmun thlir leh, party thuam chak dan ngaihtuaha zin a ni a, assembly inthlanah seat 60 awm aṭangin seat 40 lak phak an tum a ni.

BJP President-in Manipur a tlawh hma ni, Zirtawpni liam ta khan Congress hruaitu, MLA term hnih lo ni tawh M Prithiviraj Singh chuan an party chhuahsanin BJP a zawm. Singh hi MPCC ah general secretary a ni.

JP Nadda hian Bishnupur district-a Utlou ah public meeting nei nghalin, Manipur CM N Biren Singh kaihhruai sorkar chuan state hmasawnna hna tur hrang hrangte a kalpui ṭha hle a, inthlan lehah pawh mipuite pawhin an vote leh ngei a rin thu a sawi. Congress party chu na taka bei nghalin state tan engmah an thawk lo a, in quarantine ang reng an ni, a ti.

Central programme - Swacch Bharat Mission, Ujala scheme, women empowerment, Khelo India programme te chu Manipur-ah hlawhtling taka kalpui a nih thu Nadda chuan a sawi a, hei bakah hian BJP sorkar chuan National Sports University, multi sports complex-te pawh a din thu a sawi.

Sorkar laipui puihnain Manipur sorkar chuan outreach programme 'Go to Hills 2.0' a siam thu sawiin hemi hmang hian welfare scheme hnuaia hamthatna dawngtute chuan an kawtkaiah ngei an dawng thei a ni, a ti. Hill district-ah hmeichhe pual bazar pawh eng emaw zat siam a ni tih a sawi bawk.