Assam MP-in Oil palm plantation siam duh lo

Assam Lok Sabha MP Pradyut Bordoloi chuan sorkar laipuiin hmarchhak biala oil palm plantation siam a tumna chu duh loin, prime minister Narendra Modi hnenah oil palm chinin leilung a tihchhiat dan turte ngaihtuah a, he ruahmanna kalpui an tum hi ngaihtuah ṭha leh turin a ngen.

Prime Minister hnenah lehkha thawnin, Bordoloi chuan kar liam taa Guwahati-a business summit neihah, union agriculture minister-in hmarchhak bial chu oil palm chinna hmunpuia siam tum a nih chungchanga a sawi chu sawichhhuakin, "He ruahmanna siam chungchangah hian tualchhung mi, environmentalist leh stakeholder-te ngaihdante chu ngaihthah sak an ni," a ti.

"Ram pawn lam aṭanga tel ei chi lakluh tihtlem a, intodelhna tura hmalak tumna hi thil lawmawm tak a ni. Mahse heng ruahmannate hi ram leilungin a tuar phahna tur chuan ka kalpui tur a ni lo, a bik takin hmarchhak biodiversity hausa tak tihchhiatna tur ngat phei chuan," tiin a sawi.

Oil palm chin chu hun thui tak thlir loh chuan sum lakluhna kawnga ṭha tak nia a lan theih thu a sawi a, hun rei zawk leh eizawnna ngelnghet kalpuina atan erawh a chi loh niin a sawi. "Zirchianna aṭanga a lan danin oil palm plantation-te hian ramngaw pangngai aiin carbon an khawl tlem zawk a, hei hian climate change thlengin a nghawng zui thei a ni," a ti. Agriculture lam tihhmasawnna chu thil ṭul tak a nih laiin, a daih rei leh ngelnghet zawk tur ngaihtuah a ṭul thu a sawi a, stakeholder hrang hrangte pawh biak rawn phawt an ṭul thu a sawi.

Hmarchhak bial tan oil palm chin chu thil thar a ni lo a, mahse zau zawk leh nasa zawka chin tumna chu kalpui a nih hmain zirchianna neih a ngai a ni, a ti.

Sorkar laipui chuan central scheme, National Mission on Edible Oils-Oil Palm hmangin hmarchhak bial leh Andaman and Nicobar Island-a uar zawka oil palm chin chhoh a tum a, he mission atan hian cheng vaibelchhe 11,040 a ruahman a ni. Hmarchhak state ṭhenkhat chuan hma an la ṭan tawh a, hetih lai hian he mission-in envinronment leh wildlife lamah nghawng ṭha lo tak a neih theih thu sawiin, expert leh politician ṭhenkhat chuan oil palm plantation siam tumna hi an dodal a ni.