CorCom-in lungawi lohna lantir dawn
Manipur-a helpawl paruk telna, Coordination Committee (CorCom) chuan Indian Union leh Manipur zawmkhawm a nih duh lohna lantirin, October 15 hian state pumah total-shutdown neih an tum.
Shutdown neih chhung hian medical leh fire service bakah media lamte chu ngaihnathiam an ni ang. Zing dar 6 aṭanga tlai dar 6 thleng lungawi lohna hi an lantir dawn a ni.
CorCom chuan thuchhuah an siamah, kum 1949 September 21 khan hetih laia Manipur lal, Bodhachandra chu India sorkar chuan Indian Union-a inchhun luhna tur Merget Agreement a ziah turin a nawr lui a, October 15, 1949 khan Maharaja Bodhachandra Singh leh sorkar laipui aiawh, VP Menon-te chuan Manipur Merger Agreement chu an ziak ta a ni, a ti.
He inremna ziak tur hian Manipur lal hi nawr luih a ni a, Shillong-a a bungalow pawh Indian armed force-ten an hual tlat tih sawiin, sorkar laipui chet dan chu international law kalh a nih thu an sawi bawk.
Total-shutdown neih tum vang hian state chhungah pawh venhimna lam khauh taka kalpui nghal a ni a, venhim hna thawk tur hian police-te bakah special police commando, state leh central paramilitary force-te duty tir an ni.
Manipur-ah hel 4 kap hlum
Manipur-a Thoubal district-ah security force-ten inlakkhran duhtu hel pali an kaphlum tih official-te chuan an sawi.
Assam Rifles leh Indian Army-a 3 Corps-te hian hel an awm thu an dawn bawhzuiin, Inrinni khan Thoubal district-a Hingojang-ah joint operation hi an nei a ni. Pathianni zing khan helte nen hian inkapin, hel pali an kaphlum a, midang pariat erawh an tlanchhe hman nia sawi a ni.
An inkahna hmun Security force-te hian hel tlanchhiate hi man ngei tumin beihpui hi an thlak chhunzawm zel tih official-te chuan an sawi bawk.