Arunachal Pradesh tana cadre hran siam dil

Arunachal Pradesh governor BD Mishra chuan vice president Venkaiah Naidu-a'n an state a tlawh ṭumin IAS, IPS leh IFS-ah Arunachal Pradesh cadre siam sak turin a ngen. Hei bakah hian AP-a IAS leh IPS officer senior rank-te awm hun chu kum li leh, IAS leh IPS junior officer-te awm hun chu kum ngaah tihpun sak turin a ngen bawk.

Arunachal Pradesh hian IAS, IPS leh IFS cadre hran a nei lo a, an state-a civil service officer dahte chu AGMUT cadre hnuaiah an awm a ni.

Chief minister Pema Khandu pawhin state tan hian cadre hran siam turin sorkar laipui alo ngen fo tawh a, mahse tun thleng a la hlawhtling lo a ni. Cadre hran a nih loh avangin an state-a IAS, IPS leh IFS officer awmte hi kum 2-3 chauhte dah an ni ṭhin a, hei hian development project hrang hrang thawhna kawngah hmalakna a tibahlah phah ṭhin niin an sawi.

State MP, union law minister Kiren Rijiju pawhin an state tana cadre hran siam emaw, civil service officer-te awm chin pawhsei hun remchang tak a ni tih sawiin, hei hi an state dinhmun siam zelna tura thil pawimawh a ni tih a sawi ve bawk.