Manipur CM-in ‘Covid-19 Vaccination Express’vai liam

Manipur chief minister N Biren Singh chuan Thawhṭanni khan state chhung mipuite an kawtkaiah ngei vaccine pekna tura duan, ‘Covid-19 Vaccination Express’ chu a vai liam .

Vaccination express vailiamna hun hi Advisor to CM (Health) MLA Dr Sapam Ranjan, Minister S Rajen, Minister Vungzagin Valte leh Imphal West Kiran Kumar-ten an hmanpui bawk. ‘Covid-19 Vaccination Express’ atana van 15 siam chu trained staff 20-te Imphal West district-ah kaltir an ni.

Manipur sorkar leh public health chungchang buaipuitu, international non-profit organi­sation CARE India-te thawkdunin Vaccination Express hi an siam a ni.

CM Biren Singh chuan mipuite chu Covid-19 laka fimkhur ṭheuh tura ngenin, vaccine chugnchanga thu dik tawk lo thehdarhte chu awih lo turin a chah. Tun hnaia Covid-19 hri vanga thi zinga 97-98% chu vaccine la lo an ni tih a sawi. Vaccination Express 15-te hmang chuan vaccine sem chhuah hna pawh chak zawka kalpui theih a ni dawn a, vaccine an lak kim theih thuai chuan nunphung pawh a pangngai thei vat dawn a ni, a ti.

State chhunga local club leh organisation hrang hrangte chu vaccination programme kalpui mekah sorkar chu thawhpui tura sawmin, vaccine la la lote hnenah vaccine lak a pawimawh thu te, la ngei tura hneh turin a sawm.

Hri leng an tuar meka prime minister Narendra Modi-a'n an state dinhmunte a ngaihsak reng avanga lawmthu sawiin, India ram mipuite hnena a thlawna vaccine semchhuah a nih theihna atana a hmalakna chu lawmawm a ti hle tih a sawi bawk.

Covid Vaccination Express hi hmun hrang hrangah kalin, mini camp anga hman a ni ang a, mipuite hnena him taka vaccine pek a nih theihna turin health worker-te pawh training pek vek an ni.

Manipur-ah hian puitling 17,72,938-in Covid vaccine hi an la tawh a, dose khatna la hi 12,31,236 awmin a dose kima la mi 5,41,702 an awm tawh a ni.

Thawhṭanni vek hian CM Singh chuan USAID-NISHTHA/Jhpiego nena an thawhdunna, 'Project Swaraksha' chu a hawng nghal bawk. He project hnuaiah hian USAID/NISTHA team chuan vaccine la duh lote kawmin an rilru hnehsak a, vaccination centre-a vaccine la tura hruai thlen an tum dawn a ni.