Assam-a medical college 8-na pawm

National Medical Commission (NMC) chuan upper Assam-a Lakhimpur Medical College din thar chu Thawhṭanni khan a pawmsak tak avangin Assam hian medical college pariat a nei dawn ta a ni. State medical college hrang hranga MBBS seat awm zat pawh 1,100 ah a pung chho.

Chief minister Himanta Biswa Sarma chuan medical college pariat an nei thei ta chu lawmawm a tih thu sawiin, he college tharah hian seat 100 a awm tih a sawi. Hengte nena an state-a MBBS seat awm zat chu 1,100 a tling tih sawiin Assam tana hmasawnna chhinchhiah tlak a nih thu a sawi. Kum 2006-a MBBS seat 364 awm aṭangin kumina chuan 1,100-ah a pung a, hengte hi state medical college vek niin, private medical college erawh Assam-ah hian a la awm lo a ni.

Medical education director Anup Kumar Barman chuan 2021-22 academic session-ah medical college-a seat awm zat hi lak kim vek a ni dawn tih sawiin, seat awm zat aṭanga 85% chu state quota-a dah a ni dawn a, hei hian Assam mi, medical lam zir duhten tan kawng a hawn zau sak dawn hle a ni, a ti.

Dubri leh Nalbari-ah medical college dang pahnih sak meka nih thu sawiin, nakkum lamah hawn hman theih beisei a ni tih Barman chuan a sawi bawk. "Heng medical college pahnih aṭang hian MBBS seat 200 dang siam belh leh kan tum a, nakkum academic session aṭang chuan state medical college-a seat awm zat hi 1,300 ah tihpun hman kan tum a ni," tiin a sawi.