Tripura Left Front chairman Covid vangin a thi

Communist Party hruaitu hlun, Tripura Left Front chairman leh CPM central committee member Bijan Dhar chu Thawhṭanni zing khan Kokalta-ah Covid-19 vangin a thi.

Kum 70 mi, Dhar hi September 16 khan Covid-19 a kai tih hmuhchhuah a ni a, a dinhmun a ṭhat loh avangin air ambulance hmangin Kolkata panpui a ni. Kokalta an thlen hnu ni hnihah zual lam a pan avangin ICU-ah dah a ni a, a thih thlengin ICU-ah hian enkawl a ni.

Thawhṭanni tlai khan a ruang hi Agartala-ah lak nghal niin, CPM office-ah mipuiten zahna an hlan theihna turin nimin chhun khan dah niin, tlai lamah an vui liam a ni.

CPM hruaitute bakah Tripura chief minister Biplab Kumar Deb, deputy chief minister Jishnu Dev Varma-te political party hruaitu hrang hrangte chuan Dhar an ui thu hi an sawi.