Covid-19 : Hmarchhak dinhmun

Arunachal Pradesh-a Covid-19 kai pakhat chu enkawl dam niin Thawhlehni khan Covid Care Centre aṭangin chhuah tir a ni a, hri kai enkawl dam pahnihna a ni. AP-ah hian hri kai enkawl mek hi mi 55 an la awm a ni. 

DIPR chuan Pakke Kesang-a Covid Care Centre-a enkawl hi swab test ṭum thum neihsak a nih hnuah a negative vek tawh tih sawiin, chhuah tir a nih thu a sawi. April 17 khan hri kai pakhat chu enkawl dam a lo ni tawh bawk. Thawhlehnia sample endik zingah hri kai hmuh thar an awm lo a, sample 1,555 result nghak mek an la awm thung. 

Assam-ah hri kai an la pun belh zel a, hri kai hmuh chhuah tawh hi mi 3,050 an awm tawh a ni. 

Health minister Himanta Biswa Sarma chuan Thawhlehni khan hri kai 113 hmuh chhuah belh an ni tih a sawi. 

Hri kai hmuh tawh zinga 1,097 chu enkawl dam ni tawhin, enkawl mek 1,845 an awm a ni. 

Thawhlehni zan khan Manipur-a Delhi aṭanga haw mi 22 chuan Covid-19 an kai tih hmuh chhuah a ni. Heng mite nen hian Manipur-a  hri kai hmuh tawh hi mi 304 an tling tawh. 

Hri kai hmuh tharte hi Kangkokpi leh Chandel district mite an ni a, Regional Institute of Medical Sciences (RIMS) leh Jawaharlal Nehru Institute of Medical Sciences (JNIMS)-a Covid-19 Care facility-ah dah luh an ni a, ngaihtuahawm an awm lo tih additional health director Dr K Sashee­kumar Mangang chuan a sawi. 

Thawhlehni zan khan Meghalaya-ah hri kai pathum hmuh chhuah an ni leh a, anni nen hri kai hmuh tawh hi mi 43 an awm tawh a ni. 

Hri kai hmuh tharte hi Delhi leh Chennai aṭanga haw an ni a; Tura, West Jaintia Hills leh Shillong, East Khasi Hills district mi an ni. 

Hri kai zinga 13 chu enkawl dam an ni tawh a, enkawl mek mi 29 an awm. Sample lakkhawm hi  11,492 a tling tawh a, heng zinga 250 result chu tihchhuah ala ni lo. 

Nagaland-ah nimin khan Udaipur aṭanga haw pakhat chu hri a kai tih hmuh chhuah a ni leh a, Covid-19 kai hmuh tawh hi mi 128 an awm tawh. 

Health minister S Pangnyu Phom chuan sample 273 test zingah Kohima Quarantine Centre-a awm mek pakhatin hri hi a kai tih hmuh a nih thu a sawi. 

Nagaland-a hri kai hmuh tawh mi 128 zingah mi 10 chu enkawl dam an ni tawh a, enkawl mek mi 118 an awm a ni. 

Sikkim-a Covid-19 kai hmuh mi 13 zinga pathum chu enkawl dam an ni tawh a, hri kai enkawl mek hi mi 10 an la awm. 

Tripura-ah Thawhlehni khan hri kai hmuh chhuah thar mi 26 an awm a, hemi ni vek hian Covid-19 kai pakhatin a thihpui bawk a ni. Hri kai hi mi 867 hmuh an ni tawh a ni. 

Thawhlehnia sample 1,450 endik zinga 26 an positive thu chief minister Biplab Kumar Deb chuan a sawi a, heng zinga 18 chu Sepajijala district mi an ni a, South district-ah mi paruk leh Khowai district-ah mi pahnih an awm bawk. 

Tripura-a hri kai hmuh tawh zinga mi 192 chu enkawl dam an ni tawh a, hri kai mek hi 670 an awm a ni. 

Sample 42,552 lakkhawm a ni a, heng zinga  38,547 chu endik a ni tawh a ni.