Meghalaya pawl hrang hrang ten Citizenship Bill an dodal

Meghalaya-a pawl hrang hrang te chuan Citizenship (Amendment) Bill, 2016 chu an duh lohzia lantirin Joint Parliamentary Committee (JPC)-ten Shillong-a State Convention Hall-a an neihah an duh lohna hi an lantir a ni.

He bill hi Lok Sabha-a pharh niin ramdang mi India rama kum ruk awm tling tawhte chu khua leh tui nihna pek theihna tur bill a ni a, hemi bill hi hmarchhak state hrang hrangah duh lohna lantir a ni mek bawk.

North East Students Orga­nisation (NESO) chuan Committee-ah hian petition thehlutin ram leilung mite chu danpui hnuaia humhalh an ṭul thu an ziak.

NESO Chairman Samuek B Jurwa chuan Bill chu an dodal thu sawiin Inner Line Permit system pawh siam vat an ngiat dawn thu a sawi.

Bill chu Hindu mi Bang­ladesh-a awm te ramchhunga an lo luh theihna atana siam a nih thu sawiin mipuite chuan bill chu sakhuana nena inzawmna a neih avanga mak an tih thu a sawi bawk.

Citizenship Bill duh lohna lantirnaah hian pawl hrang hrang 10 vel an tel a, heng zingah hian Indigenous Nationalist Party of Twipra (Tripura) leh Grand Coun­cil of Chiefs-te pawh an tel a ni.

INPT leader M Debbarma pawhin Tripura-ah chuan ramdang mi pem lut an tam thu leh hemi anih avang hian a ram leilung fate chu a tlem zawk an nih tawh thu a sawi.

JPC chairman leh BJP MP ni bawk Rajendra Agrawal chuan he bill hi state tenau Meghalaya ang tan chuan a hlauhawm hle tih a sawi a, Deputy Chief Minister P Tynsong pawhin Meghalaya tan hlawkna pakhatmah a awm loh thu a sawi ve bawk.