AP : Cabinet in Hollongi Airport recommendation pawmpui
Arunachal Pradesh state Cabinet chuan Ningani khan Chief Minister Pema Khandu kaihhruaina hnuaiah Itanagar-ah meeting neiin, Hollongi-a Greenfield Airport siam tur chungchanga report Nabam Rebia, Minister for Land Management, kaihruaina hnuaia Committee in an siam chu thlir hoin recommendation an siam te an pawmpui. An recommendation-ah hian sorkar laipui hnenah project hi a rang thei ang bera kalpui tura hma la tura ngenna an ziak.
Report an enhoah hian Hollongi-a airport siamna tura sorkar laipuiin ram acre 948.56 a zawn chungchang pawh tarlan a ni.
Cabinet hian state chhunga telecom infrastructure tana Right of Way (RoW) pekna tur policy pawh a pawmpui bawk a, Communication Ministry hian district leh thingtlang zawng zawng internet hmanga connet vek theihna turin Union Minister of State for Communications (I/C) Manoj Sinha chuan April 26 khan state sorkar ṭanpuina a lo ngen tawh a, cabinet chuan hei hi an pawmpui ta a ni.
State cabinet hian competitive exam pe tur tana kum bithliah pawh kum 30 aṭanga 32-a tihsan rawtna chu a pawmpui bawk a, APST ho tan phei chuan kum nga relaxation a awm avangin kum 37 thleng exam hi an pe thei dawn a ni. Arunachal Pradesh Public Service Commission tihchakna turin Cabinet chuan category ṭhenkhatah post pasarih an siam belh bawk.