Assam : Citizenship Bill duh lohna zual zel
Hmarchhak hmun hrang hrangah Citizenship (Amendment) Bill, 2016 duh lohna chu a zual zel a, Assam-a Krishak Mukti Sangram Samiti (KMSS)-te chuan Pathianni zing khan state pum huapin duh lohna an lantir ve leh a, anni bakah hian NGO pawl pakhat Prabajan Virodhi Manch pawhin May 19 hian Prime Minister Narendra Modi hnenah bill an duh lohzia lantirna memorandum an thehlut dawn tih Inrinni khan an sawi ve bawk.
Prabajan Virodhi Manch memorandum-ah hian bill duh lote hming ziahna, signature nuai nga tal thehluh tel an tum bawk a ni.
KMSS hian bill an duh lohzia lantirin Chandmari-a Assam Movement memorial-ah an pungkhawm a, he chanchin ziah lai hian thu kimchang hriat hman ni lo mah se bill dodalna leaflet-te pawh sem an tum a, hemi chungchangah hian house-to-house visit-te pawh neih an la tum tih an sawi.
Guwahati-a dodalna an neih zawh hnuah hian Sivasagar, Dibrugarh, Nagaon, Barpeta leh Tezpur-ah te pawh dodalna hi chhunzawm an la tum leh bawk tih an sawi.
KMSS adviser Akhil Gogoi chuan KMSS hruaitu te chuan dodalna lantir tur hian pawl dang te nen pawh an thawh ho zel dawn thu a sawi a, North East Students’ Organisation (Neso) ten Dighalipukhuri-a Bbill duh lohna an lantir pawh khan an pawl hruaitute chu an tel tih a sawi a, All Assam Students’ Union (AASU) hriatute pawh an tel tih a sawi bawk.