PDA in Lok Sabha by-poll atan campaign a ṭan

Nagaland-a Lok Sabha inthlanna neih tur atan rorellai People’s Democratic Alliance (PDA) chuan Thawhlehni khan cam­paign kick off an nei a, hneh­na an chan ngei tur thu an sawi.

Campaign Kick off hi DDSC stadium, Dimapur-ah neih niin PDA candidate chu hnehna chang tura an rintawk thu PDA lam chuan an tlangaupui nasa hle. PDA member NDPP Working President, Alemtemshi Jamir chuan PDA chuan inthlanna neih zawh chiah takah vote 996170-ah vote 521549 lai an hmuh thu leh an khingpui NPF chuan vote 389912 chauh an hmu tih sawiin Lok Sabha seat inchuhnaah pawh hian hnehna an chang ngei dawn niin a sawi bawk.

NDPP hruaitu leh Chief Minister ni bawk Neiphiu Rio pawhin PDF candidate Tokheho chu a rintawk thu sawiin Tokheho chuan experience tam tak a bulṭhut aṭangin a neih thu a sawi a, a khingpui tur ai pawn experience hi a nei ṭha zawk hle niin a sawi.

Ṭangrual pawl, PDA hi kumin Nagaland inthlan zawh hnuah chauh khan din niin PDA hnuaiah hian NDPP (18), BJP (12), NPP (2) bakah JD(U) legislator pakhat bakah Independent candidate pakhat an awm bawk a ni.

Nagaland Lok Sabha seat hi NDPP hruaitu Neiphiu Rio-an state Assembly inthlan dawn khan Chief Ministerial Candidate a nih dawn avangin a chhuahsan a ni.

Nagaland Lok Sabha by-poll election hi May 28-a neih tur a nih thu Election Commission of India chuan an tarlang tawh a, May 31-ah vote chhiar a ni ang.

Election Commission of India (ECI), District Magistrate of Mon, K Thavaseelan (IAS) chuan thuchhuah siamin Mon District chhungah inthlan neih hma chu ralthuam reng reng, phalna neia kawl te pawh an kuta dah phal a ni dawn lo tih thupek a chhuah.

Thavaseelan chuan phalna neia silai kawl te pawhin Mat 20 hma ngeiin an hnaih ber police station-a dahna turin thupek a tichhuak. Hei hi inthlanna ralmuang tak a awm theih nana ti a nih thu a sawi.

Nagaland Lok Sabha inthlan­ah hian PDA leh NPF chiah an inkhing dawn a, eptu pawl lian ni ṭhin Congress party chuan nomination an file lo a ni.

NDPP aiawh hian Tokheho Yepthomi a ding dawn a, a symbol-ah 'Globe' a ni dawn a, hetih lai hian NPP aiawh hian C Apok Jamir chu dingin a symbol-ah hian 'Arpa' a hmang dawn thung.