Nikuma hel 50 inpe ten rehabilitation package dawng lo

Kum khat dawn lai liamtaa Meghalaya-a hel 50 chuang, police kuta inpete chuan state sorkar hnen aṭangin stipend leh rehabilitation package engmah an dawn loh thu an sawi.

Heng hel, an helna bansan te hi a tam ber hi Garo National Liberation Army (GNLA) mi an ni a, GNLA deputy commander hlui Zen R Ch Marak chuan helpawl an chhuahsan aṭangin state sorkar in nunbul an ṭan leh theihna tur engmah an la pek loh thu a sawi a, thla tina stipend pek tura an tih pawh chu pakhatmah an la hmuh loh thu sawiin rehabilitation package pawh pakhatmah an la dawng lo niin a sawi. Marak chuan sorkarin an dinhmun chu ensak se a duh thu sawiin ei an hmuhna tur bulṭanna chu pe se a duh thu a sawi bawk.

Marak chuan sorkarin ti tura a tih ang zawng zawng an tih vek tawh thu a sawi a, an ID leh an account detail-te pawh an thehlut vek tawh nia sawiin heti chung hian sorkar lam chuan aw an la nei lo niin a sawi a ni.

Hemi chungchangah hian heng helna bansante hian Meghalaya DGP SB Singh an be tawh a, Singh chuan package an dawn turte chu state sorkarin a sanction tawh thu a sawi a, buaipui ngai buaipui a nih zawh hunah a dawng turte hnen hi a thleng dawn tih a sawi a, DGP chuan an pekchhuak theih ṭep tawh thu a sawi bawk.