Assam-in Japanese Encephalitis vaccine campaign nei

Assam sorkar chuan Thawhlehni aṭang khan kum 15-65 inkar tan Japanese Encephalitis(JE) vaccine pek chhuah runpui a kalpui ṭan a, mi nuai 40.17-te hnenah JE vaccine hi pek a tum.

Kum 2020 khan Assam-ah hian JE vangin mi 60 chuang an thi a, district zawng zawngah he hri kai hmuhchhuah hi an awm a ni. Kum 2019 khan mi 154 in an thihpui bawk.

Kamrup (Metropo­litan) district-a Sonapur District Hospital aṭangin vaccination campaign hi ṭan a ni a, campaign hawngtu state health minister Keshab Mahanta chuan hlawhtling taka kalpui a nih theihna turin mipuite pawh sorkar hmalakna chu thawhpui ṭha turin a chah. Covid-19 vaccine pek chhuah pawh hlawhtling takin an kalpui mek a, hetiang bawkin JE vaccine pek chhuah pawh hi a hlawhtlin chhoh a beisei thu a sawi. Assam-ah hian Covid-19 vaccine dose khatna hi mi vaibelchhe hnih chuangin an la tawh a, dose bikima la mi vaibelchhe 2.65 an awm tawh bawk.

State sorkar chuan JE vaccine hi a hmain kum 1-15 hnenah sorkar laipuiin Universal Vaccination Programme a siam hnuai­ah pek a lo ni tawh a ni. Tun hnaiah sorkar laipuiiin he hri hmuhchhuah tamna district-ah puitling te hnena vaccine hi pek an ni dawn tih a puang leh a ni. Assam chu kumin aṭangin he campaign hi kalpui ṭan phalsak a ni.

JE case hmuh chhuah tam zualna, development circle 99-ah vaccine hi pek chhuah hmasak a ni ang. JE virus hi he hri paitu thosiin a seh aṭangin mihringten an kai thei a ni.

Director of health services (family welfare) Munindra Ngatey chuan Covid-19 vaccine la te chuan an lak aṭanga ni 28 hnuah JE vaccine hi an lak leh nghal theih thu a sawi. Hetiang bawkin JE vaccine la hmasa pawhin ni 28 hnuah Covid vaccine hi an la thei bawk a ni.

Thawhlehni vek khan Health Minister chuan district pakuaa Covid vaccine pek chhuah hna kalpuina tur, Covid Vaccine Express 12 a vailiam nghal bawk.