China-in AP-a Vice President zin a dodalna India sorkarin a dem thu a tarlang

Vice President Venkaiah Naidu-a'n tun hnaia Arunachal Pradesh state a tlawh chu China chuan dodalin a sawisel a, hei hi India sorkar chuan Nilaini khan chhangin China chu a dem thu a sawi. Arunachal Pradesh chu India ram chhung, lak hran theih loh a ni tih a tarlang.

Ministry of external affairs (MEA) thupuangtu Arindam Bagchi chuan India ram hruaituten India state Arunachal Pradesh state an tlawh, China-in a lo dodal ve ngawt chu thil awmze nei lo a ni, a ti. "China official-in hemi chungchanga a thusawi pawh kan lo hria a ni. Hetiang zawnga thu an sawi hi kan dem takzet a, Arunachal Pradesh hi India ram chhung ami a ni a, lak hran theih a ni lo," a ti.

Bagchi chuan India ram hruaitute chuan an tihdan phung pangngaiin state dang ang bawkin Arunachal Pradesh state hi an tlawh fo a ni, tiin a sawi.

MEA thupuangtu hian Ladakh khawchhak lama Line of Actual Control-a ram pahnihte inepna thleng chungchang pawh a sawichhuak a, China chu thil dang buaipui loa helai hmuna an buaina chinfel dan ngaihtuah zawk turin a ti. October 10 khan ram pahnihte hian Corps Commander level meeting neiin buaina chinfel dan an ngaihtuah a, mahse India lam rawtna chu China lam hian an pawmsak duh loh vangin meeting hi resolution pawh siam loin an titawp a ni.

China hian Arunachal Pradesh hi a ram chinah ngaiin, India ramah a pawm ve lo a ni. Hei vang hian tun hnaia Vice President Naidu-a zin pawh China foreign ministry chuan a sawisel nghal a, ministry thupuangtu Zhao Lijan chuan, "China-India boundary chungchanga China dinna a la ngai reng a ni.

China sorkar chuan Arunachal Pradesh tia sawi hi a pawm ngai lo a, hei hi India lamin dan kalha an din a ni. Hei vang hian India ram hruaituin he hmun a tlawh hi a duh loin a dodal a ni," a ti. India lam chu China duhdan zahsak a, ramria boruak ṭha lo siam thei zawnga che tawh lo tura an ngen thu a sawi bawk.