Meghalaya Enviroment Minister hnenah PETA India Award hlan dawn

People for the Ethical Treatment of Animals (PETA) India chuan Meghalaya forest & environment minister James P K Sangma chu e Progressive Business Concept Award dawng turin a thlang.

Minister Sangma hian an state-a thei an ngah zawng, lakhuihthei aṭangin 'vegan leather' siam chhuah tumin hma a lak thu a sawi. Hei bakah hian state sorkar chuan climate change museum siam a duh thu leh, he topic hi school zirlaiah pawh telh a duh thu a sawi bawk.

PETA India Senior Campaigns Coordinator Radhika Suryavanshi chuan minister Sangma-a'n tualchhunga lonei­tute puihna ni paha, lakhuihthei aṭanga vegan leather siam chhuah dan ngaihtuah pui tura a intiamna chu lawmawm an tih thu sawiin, hei hi ramsa leh environment humhalhna tur pawimawh tak a ni, a ti. Hetianga hmathlir ṭha tak a neih avang hian Sangma hnenah hian PETA India chuan lawmthu a sawi bawk.

Sangma hian TiE Hyderabad-in 'TiE Sustainability Summit 2021' a buatsaiha virtual hmanga thu a sawiah lakhuihthei aṭanga 'vegan leather' siam tuma hma an lak mek thu hi a sawi a ni. Meghalaya hi India rama lakhuihthei thar chhuak tam zinga mi a ni a, India ram puma lakhuithei tharchhuah zinga 8% vel an thar pha a ni. An state tana thei pawimawh tak a ni a, hei vang hian ṭangkai zawka hman dan an ngaihtuah tih a sawi a ni.