Assam-in naupang nuai 70 Covid vaccine pek a tum

Assam state immunisation office chuan state chhunga naupang, kum 2 -18 inkar mi nuai 70-te Covid vaccine pek an tum tih a sawi.

Sorkar laipui chuan naupangte hnena Covid vaccine pek chhuah dan hi state sorkar chu la sawipui lo mah se, nodal officer on Covid vaccination Muhindra Nath Ngatey chuan ruahmanna siamin, naupang tam zawk hian an school-ah vaccine hi pek an tum tih a sawi a ni.

Assam-ah hian elementary school zirlai nuai 50 vel an awm. Elementary school hi hri leng thawh hnihna thleng vangin April thla aṭang khan khar an ni a, mahse hri lengin ziaawm lam a pan tak avangin October 19 aṭangin school hawn a ni tawh ang.

Ngatey chuan, "Nau­pangte hnena vaccine semchhuah hi a awlsam zawk dawn. Kum 2-15 inkarte chu immunisation programme hnuaiha vaccine pek an lo ni thin a, hetiang bawk hian awlsam takin kan pe thei dawn a ni. School-te pawh hawn a nih leh dawn tak avangin , school campus-ah a tam zawk hi vaccine pek theih an ni ang," a ti. Naupang vaccine pek tur zinga 80% vel chu school-ah pek an ni thei dawn a, hemi hma hian health facility aṭang hian pek chhuah hmasak a ni phawt dawn niin health department official-te chuan an sawi.

Assam-a Covid-19 hri kai hmuh chhuah tawh zingah hian kum nga hnuai 12,000 vel an awm a, kum 6-18 inkar 55,000 an awm bawk. Kum 18 hnuai lam hri kai hmuhte hi state puma hri kai hmuhchhuah zawng zawng aṭanga 11% an tling a ni.

Chief minister Himanta Biswa Sarma chuan Subject Expert Committe (SEC) in naupangte tana Covaxin hman a remti chu hri dona kawnga hmasawnna lian tak a ni tih a sawi.