Tripura-a Tourism hmasawnna turin Rs. vaibelchhe 48 dah

Minister for Tourism Pranajit Singha Roy chuan Nilaini khan sorkar laipuiin Tripura-a tourism hmasawnna turin sorkar laipui chuan project pahnih kalpuina tur cheng vaibelchhe 48 an sanction thu a sawi.

Singha Roy chuan heng project pahnih te hi DoNER ministry hnuaia North East Spe­cial Infrastructure Development Scheme meeting New Delhi-a kar hmasaa neihah an pawmpui tih a sawi bawk.

Roy chuan project hma­sa zawk atan hian cheng vaibelchhe 24.42 dah anih thu leh a hnu­hnung zawk atan hian cheng veibelchhe 23.40 dah a nih thu a sawi a ni.

Minister chuan heng project-te hi Agartala aṭanga km80-a hlaa awm Amarpur-a Fatiksagar leh Gomati district-a Chabimura inkar kawng­pui km 8-a thuia pawhseina tur a nih thu leh Gomati district-a Tirtha-mukh leh Dhalai district-a Raishyabari inkar kawngpui km 20-a thuia hmasawnna thlenna tur a nih thu a sawi bawk.

Tourism Minister chuan Chabimura leh Tirthamukh-ah te hian thil pawimawh eng emaw zat a awm thu a sawi a, mahse an function mu­mal tawh lo tih sawiin kawngpui pawh a ṭha tawh lo tih a sawi a, heng hmun pahnihah hian nasa zawka hmasawnna thlen an tum thu a sawi a ni.

Minister chuan sorkar hmasa Left front chuan tourism sector an ngaihsak loh thu a sawi a, hemi a nih avang hian hmasawnna pawh kum rei tak hemi kawngah hian a awm lo tih a sawi bawk.

Chief Minister Biplap Kumar Deb pawhin tou­rism sector lamah nasa taka hma an lak tur thu a lo sawi tawh bawk a ni.