AP : AAPSU-in CM hnenah memorandum thehlut

Arunachal Pradesh-a zirlai pawl lian ber All Arunachal Pradesh Students’ Union (AAPSU) chuan state chhung hmun hrang hranga school-ah survey neiin school tam takah tui in tur mumal leh facility an neih ṭhat tawk loh avangin Chief Minister Pema Khandu hnenah memorandum an thehlut.

AAPSU survey chuan Arunachal Pradesh chhunga school awm zawng zawng zinga 53%-ah tui in tur mumal a awm loh thu an tarlang a, 20% chiahin library leh laboratory an nei tih an tarlang bawk a, 40% chuan facility mumal an neih loh thu tarlangin 48% chuan school hungna boundary wall an nei lo tih an tarlang.

Hemi a nih avang hian zirlai pawl hian Thawhlehni khan chief minister hnenah memorandum an thehlut a, he survey hi 2017-2018 chhunga an neih a nih thu an sawi bawk.

School hrang hranga buaina an tawh te enfiah tur hian district hrang hranga an member ten an enfiah thu an sawi.

Survey chuan dawhkan leh ṭhutna indaih lohna school tam tak a awm thu tarlangin sorkar school-ah te pawh lehkhabu supply a ṭhat tawk loh thu an tarlang bawk a ni.

School 80% chuan land possession certificate an nei lo a, primary school tam takah zirtirtu pakhat chauh an awm thu leh 80% chuan computer an nei loh tih survey an neih aṭangin an tarlang bawk.

CM hnena memorandum an thehluhah chuan survey an neih chuan school tam zawkah facility mumal a awm lo tih a tilang chiang hle tih an ziak a, school tam takah zirtirtu pawh an indaih lo hle tih an ziak bawk a ni.

Memorandum-ah chuan lehkhabu semna tur fund te chu pechhuak ve ṭhin bawk mah se a hun takah zirlaite hnen a thleng ngai lo tih an ziaklang bawk.

Hemi a nih avang hian state sorkar chu zirna in ten hma an sawn theih nan nasa zawkin hma la se an duh thu an ziak a ni.