Tripura : Congress mi 350 vel phalna nei loa rally neih vangin man

Tripura Congress worker leh hruaitu mi 350 vel chu Ningani khan phalna nei loa rally an buatsaih avangin man an ni a, Congress party mi leh sa pungkhawmte hian Karnataka-a BJP sorkar siam tura koh a nih duh lohna leh Tripura-a an party office tam tak BJP in an tihchhiatsak duh lohna lantir nan rally hi an buatsaih a ni.

West Tripura District Police chief Ajit Pratap Singh chuan Congress mi leh sa te hi phalna nei loa rally an huaihawt avanga man an nih thu leh a hnuah chhuah leh nghal vek an nih thu a sawi.

Tripura Congress Vice Pre­sident Tapas Dey chuan a hmain Agartala-a ‘Jan Aakrosh rally’ buatsaih dilna Police hnenah an thlen tawh thu leh an phalsak loh thu a sawi ve bawk.

Dey bakah hian state party chief Birajit Sinha leh legislator hlui Gopal Roy-te pawh man an ni a, anni hian state a sorkarna siam lai Bharatiya Janata Party (BJP) sorkar chuan dan leh thupek pawh ngaihtuah lo in state chhung hmun hrang hranga Congress party office 15 lai mai chu an nawrchhiat sak thu an sawi.

Dey chuan heng office ṭhenkhat hi chun kum 70 chuang te a nih tawh avangin document mumal pawh an neih tawh loh thu a sawi a, West Tripura District Magis­trate leh Collector-te pawhin local court in office tichhe lo tura an thutlukna siam pawh an zawm lo a ni, a ti.

CPI-M office eng emaw zat pawh BJP sorkar hian an nawr chhiat sak thu an sawi bawk.

CPI-M state Secretary Bijan Dhar pawhin BJP in sor­karna an siam hnu lawk aṭang khan an party office za chuang zet chu beih a nih thu leh an party mi leh sa te pawhin beih an tawk niin a sawi.

Hetih lai hian BJP lam chuan Congress leh CPI-M in an puhna hi an pha ve thung a, heng political party-te hian an party office hi sorkar ramah dan lo in an sa niin an sawi ve thung a ni.