Tripura-in Covid vaccine dose khatna pechhuak ṭha ber

Hmarchhak state zingah Tripura chu Covid-19 dose khatna pe chhuak ṭha ber a ni a, vaccine la thei chin zinga 97% in dose khatna hi an la tawh. Hetih lai hian Manipur chu vaccine pe chhuak tlem ber a ni.

Tripura-ah hian puitling, kum 18 chunglam nuai 25 awmin, an zinga 97% in vaccine dose khatna an la tawh a, 67% in a dose kimin an la tawh bawk. Vaccine la thei zingah hian kum 45 chung lam nuai 9.94 leh kum 18-44 inkar nuai 16.3 an awm a ni.

Assam-ah kum 18 chung lam vaibelchhe 2.33 an awm a, an zainga mi 1,96,87,331 te chuan dose khatna la tawhin, mi 65,00,549 in dose bikimin an la tawh bawk. Dose khatna la hi 84% an tlin tawh laiin, dose kima la hi 27% chauh an la ni thung.

Manipur chuan vaccine dose khatna hi mi 12,33,102 hnehah pe tawhin, dose kima la mi 2,62,694 an awm bawk.

Nagaland-ah dose khatna la mi 6,97,456 an awm tawh a, dose kima la 4,23,059 an awm. Meghalaya-ah puitling zinga vaccine dose khatna la hi 10,83,684 an nih laiin, dose kima la hi 5,36,132 an awm a ni.

Arunachal Pradesh chuan mi 7,64,333 hnenah vaccine dose khatna a pe tawh a, mi 4,76,553 hnenah dose bikimin a pe tawh bawk.