Garo zirlaiten Assam-Meghalaya ramri ennawn an phut

Garo Students Union (GSU) chuan Assam leh Meghalaya state-te inrina chu uluk taka ennawn leh an phut.

GSU member leh state ramri hrula awm, Pilangkata leh Maikhuli khaw mipuite chuan Maikhuli-ah an thil phut lantirin kawng an zawh a, chief minister Conrad K Sangma chuan ramrite chu a hmun ngeia kala enfiah turin an ngen.

Assam leh Meghalaya state sorkarin ramria buaina an neihte chinfel dan tur ngaihtuah tura a din, regional committee-te chuan tuh hnaiah ramrite hi an lo enfiah tawh hlawm a ni.

West Khasi Hills regional committee chairman leh Meghalaya cabinet minister Renikton Lyngdoh Tongkar chuan Assam nena ramri buaina an neih mek chu kum khat chhunga chinfel theih a beisei thu a sawi. Ramri-a state pahnihte an ram chin nia an hauh chungchangah hian document pawh an nei ve ve a, hengte hi enfiah a ngai a ni, a ti. Ramri chinfel tum chungchang 'give and take' ti zawnga sawi chu a ṭha a tih loh thu sawiin, "Chinfel kan duh tak zet a nih chuan kan ngaihdante pawh kan inzahsak tawn tur a ni a, inbiakna dawhkana ṭha taka sawiho a ngai a ni. Chutiang a nih loh chuan eng kawng mahin kan chingfel dawn lo a, kan damchhung zawngin buaina hi a awm reng mai dawn a ni," a ti.