Quarantine center aṭanga tlan chhuak Silchar pan relah man

Northeast Frontier Railway (NFR) chuan coronavirus kai nia rinhlelh, Kerala-a quarantine centre-a an dahna hmun aṭana tlan chhuak chu Ningani khan Silchar pan rel-ah man a nih thu an sawi. 

NFR chuan thuchhuah siamin, an mi man hi kum 24 mi,  Sairful Islam a nih thu leh, man a nih hnu hian Railway Hospital-a isolation ward-ah dah hran nghal a nih thu a sawi. He thil thleng vang hian a chuanna, Sealdah-Silchar Kanchanjunga Express-a chuang dangte pawh screening neih vek niin, in lamah inkhung hrang rih tura tih an ni bawk. 

Kerala-a hri kai nia rinhlelha khung hran, hi Assam-a Morigaon district-a cheng a ni. Quarantine center aṭang hian tlanchhukain, relin Chennai a pan a, a hnuah rel dangin Howrah a pan leh a, hemi hnu hian Kol­kata-a Sealdah station aṭangin Kanchanjunga Express in Assam lam hi a pan leh a ni. NFR CPRO chuan quarantine center aṭanga tlanchhuak chung­chang hi hriattir an nih thu sawiin, New Bongaigaon rel station-ah general coach aṭangin man a nih thu leh, damdawiinah hruai nghal a nih thu a sawi. Damdawiinah hian Railway Protection Force (RPF) leh Government Railway Police (GRP) ten uluk takin an veng zui nghal bawk.