Fuel man sang zel chungchangah HYC-in Meghalaya CM hnenah ngenna thlen

Meghalaya-a social organisation Hynniewtrep Youths' Council (HYC) chuan fuel man sang zel chungchangah a ṭul anga hma la turin chief minister Conrad K Sangma an ngen.

HYC general secretary Roy Synrem chuan fuel man sang vang hian state chhunga transportation man pawh a san phah zel tih sawiin, hei hian mipuite nitin mamawh man thlengin nghawng a nei chho a ni, a ti. State chhung mamawh zawng zawng deuhthaw chu motora lakluh a ni a, heng mamawh phurh mante hi a to chhoh zel chuan state mipui, a bikin loneitute a nghawng na hle dawn niin a sawi.

"Khawvel pumah Covid-19 hri leng vangin harsatna kan tawk a, hetih lai hian sorkar laipui leh state sorkar chuan fuel-a chhiah tam tak lain a man a tihsan phah a, mipuite harsatna an thlen belhchhah a ni, " a ti. International crude oil man aṭanga chhutin, India rama fuel man sanna chhan ber chu sorkar laipui leh state sorkarin chhiah an tihsan vang a nih thu a sawi bawk.

Sorkar laipuiin petrol-ah excise duty hi litre khatah Rs 32-33 a la a, hemi hnuah state sorkar chuan VAT-ah Rs 22-23 a la ve leh bawk tih HYC general secretary chuan a sawi. Diesel-ah sorkar laipuiin chhiah hi litre khatah Rs 31-32 lain, state sorkarin Rs 13-14 a la ve leh bawk. Kar liam ta kartawp lam khan Meghalaya-ah petrol man hi litre khatah Rs 100 a tling tawh a ni.