Assam: Zirlaiten zirtirtu ṭhingthiin ngaihdam dil tir ; Sorkarin thil thlendan chhui chiang turin thupek tichhuak

Assam-a Tinsukia district-a Philobari khuaa school zirlaite chuan an zirtirtu hmeichhe pakhat chu fee tihsan tumna duh loa zirlai nawrh huaihawtte hmaah ṭhingṭhia ngaihdam an dil luih tir. He thil thleng hi chhuichiang turin sorkar chuan thupek a tichhuak a ni.

School zirtirtu hmeichhia, kawngpuia ṭhingthi chung leh kutsuiha zirlaite hnenah ngaihdam a dil lai video hi social media lamah pawh a darh nasa hle. Eptu party Congress chuan zirtirtu chunga thil thleng hi an dem thu an sawi nghal.

Nawrh huaihawtte hi Philobari Senior Secondary School zirlaite an ni a, fee tihsan tumna duh lohin October 11 khan an school bul kawngpui an dang a ni. Zirtirtute chuan zirlaite chu kawngpui dang lo turin an ngen a, zirtirtu leh zirlaite hi an inhnialbuai zui a, a hnuah zirlaite hian zirtirtu zinga pakhat chu nawrh huaihawt chungchang a sawisel avangin ṭhingṭhiin ngaihdam an dil tir ta a ni.

Tinsukia district thuneitute chuan he thil thleng hi magisterial level inquiry nei turin thupek an tichhuak a, mawi lo taka zirtirtu chunga chetna thlenga inhnamhnawih leh, zirlaite fuihtu an awm em tihte chhui chhuak turin an ti.

All Assam Students Union (AASU) chuan mawi lo taka zirlaite chetna­ah hian Tinsukia district unit vice president a tel ve avangin an pawl aṭangin an hnawtchhuak nghal bawk. AASU aiawh leh nawrhnaa tel zirlai ṭhenkhatte chuan zirtirtu hi a inah tlawhin ngaihdam an dil bawk a ni.