Tripura tribal party-ten Tipraland state hran phutin Joint movement committee an din dawn

Tripura-a tribal party-te chuan Tipraland state hran din an phutna kawnga hma la turin joint movement committee din an tum.

Inrinni liam ta khan Agartala-ah tribal party lian pariatte chuan meeting neiin, joint movement committee din hi an rawt a ni. He committee-ah hian state chhunga rorellai, BJP thawhlpui Indigenoous People's Front of Tripura (IPFT) bakah, Tripura lal thlah Pradyot Kishore Debbarma-a party, TIRPA Motha-te pawh an tel.

Meeting hi IPFT general secretary leh tribal welfare minister Mevar Kumar Jamatia-a'n a kaihruai a, meeting hlawhtling tak an neih thu leh Tipraland state hran din tura hma la tur leh, an thil phut dangte buaipui turin joint movement committee chu din a ni thuai dawn tih a sawi.

Pradyot Kishore Deb Barman pawhin committee member-te chu tun thla tawp lamah Delhi-ah kalin, sorkar hotute an hmuh tur thu a sawi. IPFT-in Tipraland din an phutna leh, TIPRA-in Greater Tipraland an phutna chu a inang deuh reng tih sawiin, hei vang hian hma an la ho thei dawn niin a sawi bawk. Barman chuan TIPRA hian October 23-24 ah Delhi-a Jantar Mantar-ah an thil phut nawra nawrh huaihawt an lo tum lawk tawh thu sawiin, union home minister Amit Shah pawh hmuh an tum tih a sawi. Ka duhzawng a ni ang a, hetianga kan nawr ho theih chuan kan thawm pawh a ring thei zawk dawn a ni, a ti.

IPFT hruaitute chuan central lama BJP hruaitute chuan an bum niin an sawi a, assembly inthlan neih hmaa an laka thu an lo tiam tawhte an tihhlawhtling lo tih an sawi. IPFT hian Tripura assembly-ah MLA pariat a nei a, mahse an MLA zinga pakhat chu a bang a ni.