Manipur mipuiten Mount Harriet hming Mount Manipur tia thlak an lawm

Manipur mipuite chuan sorkar laipuiin Andaman and Nicobar Islands-a Mount Harriet hming Mount Manipur tia a thlak chu lawmawm an tih thu an sawi.

Mount Harriet hi Manipur lal, Maharaja Kulchandra Dhwaj Singh leh Manipuri freedom fighter 22-te tanna hmun a ni a,he hmun hi sorkar laipui chuan 'Mount Harriet National Park' chu 'Mount Manipur National Park' tiin a hming a thlak a ni.

Chief minister N Biren Singh chuan prime minister Narendra Modi leh union home minister Amit Shah-te chungah an hnam pasalṭhate hriatrengna puala an thiltih avangin lawmthu a sawi a, state mipuite chu PM leh Home Minister chungah an lawmzia lantirna tura candlelight celebration buatsaih turin a sawm nghal bawk.

Manipur sorkarin Mount Manipur-a hriatrengna hmun a siam turah sorkar laipui chuan a theih angin a pui zel dawn tih home minister Amit Shah chuan a sawi bawk niin CM chuan a tarlang a, memorial site siamna tur ram chungchangah hian Andaman leh Manipur sorkar aiawhte chu an inbe mek a ni, a ti.

Amit Shah chuan British awpna hnuaiah rei tak lo awm tawh mah se, Manipur freedom fighter-te chuan zalen turin British chu theihtawpin an bei let a ni tiin, Manipur war hero Yuvraj Tikendrajit leh General Thangal-te chu Imphal-a mipui hmuhah khaihlum an ni, a ti. Heng mite an kaihhlum avang hian British chuan zalenna an sualna chu an tawpsan mai a rin laiin,tlawm mai loin an bei lui zel a ni, a ti. Hei vang hian Maharaja Kulchandra Dhwaja Singh leh freedom fighter 22-te chu manin, Mount Harriet Island-ah hian hren a ni ta a ni, a ti. Maharaja Kulchandra Dhwaja Singh hriatrengna leh, ram tana a inpekna chawimawina atan Mount Harriet chu Mount Manipur tia thlak a ni ta a ni, tiin a sawi.