Pakistan ISI-ten chet lak an tum nia sawi vangin Assam Police-te inralring

Assam Police-te chuan intelligence lam aṭangin an state chhungah Pakistan spy agency, Inter Services Intelligence (ISI) in pawikawihna lian tham tak thlen an tum nia an dawn avangin an inralring nghal a, mipuite pawh fimkhur turin an chah.

Pathianni khan Assam police headquarters-a Assistant Inspector General of Police (L&O) chuan thuchhuah siamin, RSS cadre, army area, mipui punkhawmna hmun leh sakhaw hmunte chu ISI-te hian an bitum ber tur nia a lan thu a sawi. "Kan thawhpui agency hnen aṭangin Pakistan ISI-in Assam leh India hmun danga pawikhawihna thlen an tum dan hi kan dawng a ni, " tiin punkhawmna hmun leh sakhaw hmun pawimawhahte bomb/IED tihpuah an tum niin a sawi.

Assam Police thuchhuah chuan Assam sorkarin Dhalpur-a sorkar rama chengte a chhuahtir chungchangah Organization of Islamic Cooperation (OIC) General Secretariat chuan twitter lamah sawiin, Assam-a Muslim mite chunga thil thleng chu an dem thu leh, buaina chhuakah Muslim miten nunna chanin, chhungkaw tam tak hnawhchhuah an nih chungchangte a lo tarlang tawh tih a sawi bawk. "Hei bakah hian al-Qaida ten Assam leh Kashmir-a jihad an puanna video message pawh dawn a ni," tiin al Qaida chuan Indian Muslim-te kutthlak an nih lai video pawh tichhuakin ngawi renga indawmkun mai lo tura an fuihna thute a awm bawk niin an tarlang.

Commissioner of Police, Guwahati city, district police, Special DGP (T&AP) leh IP (BTAD), Kokrajhar, ADGP’s (SB/S) Assam, leh DIG zawng zawngte chu firfiakte pawikhawihna thlen tur venga an theih anga hma la tur leh, inralring turin hriattir nghal a ni.