Meghalaya Governor-in loneitute thlawp ; Union minister Ajay Mishra bang turin a phut

Meghalaya governor Satya Pal Malik chuan Uttar Pradesh-a Lakhimpur Kheri-a buaina chhuak kaihhnawiha loneituten union minister Ajay Mishra bang tura an phutna chu a thlawp thu sawiin, minister hian eng post-ah mah awm zui tlak a ni lo a, a rang thei anga berin a bang tur a ni, a ti.

Governor Malik chuan BJP sorkar chuan Farm law chungchanga loneitute duhdante an ngaihthlak sak duh lo a nih chuan thuneihna pawh an chang chhunzawm thei dawn lo niin a sawi a, minimum support price (MSP) chungchangah inremna a awm theihna turin sorkar laipuiin a remtih chuan palai hna thawh pawh a inhuam tih a sawi bawk.

Lakhimpur Kheri-a thil thleng chungchangah, union minister of state for home Mishra chu bang tura hriattir nghal a ni tur a ni tiin, "Thil dik lo tawpkhawk a ni. Lakhimpur Kheri-a buaina a thlen ni la la khan bang tura tih tur a ni zawk. Minister ni zui zel tlak a ni lo," a ti.

October 3-a Lakhimpur Kheri-a loneitu pungkhawmte chu BJP worker phurtu motor-te chuan suin loneitute nen motor hi an bei let ve a, buaina a chhuak zui ta a ni. He buaina chhuakah hian mi pariat an thi a, an zingah hian loneitu mi pali an tel. Loneitute chuan motor pakhatah hian union minister Ajay Mishra fapa Asish Mishra pawh a chuang niin an sawi. October 9 khan Asish hi man a ni.

Malik chuan mipuite natna chu sorkar chuan a hmu thiam lo tih sawiin, "Loneitute aw hi a ngaihthlak sak duh loh chuan thuneihna hi an chang chhunzawm thei tawh lo ang," a ti a, buaina chinfelna kawng khat chauh a awm thu leh, chu chu sorkarin MSP chungchanga intiamkamna a siampui a ni tiin, hemi atan hian sorkar aiawh loneitute biak pawh a inhuam thu a sawi.

Kumin March thla khan Malik hian loneitute nawrh huaihawt chu a thlawp thu a lo sawi tawh bawk a, prime minister Narendra Modi leh union home minister Amit Shah-te pawh loneitute ti tithinur lo turin a lo ngen tawh bawk.