Tripura TMC member-ten police station kawtah lungawi lohna lantir

Tripura-a Trinamool Congress (TMC) hruaitu leh member-te chuan an party ṭhalai hruaitu Santanu Sanha kutthlak a nih avangin Thawhṭanni khan East Agartala police station bulah pungkhawmin lungawi lohna an lantir.

TMC member-te chuan pawikhawihtute chungah police-te chuan hma an la lo nia sawiin, police-te laka an lungawi lohna thute an aupui. Party convener Subal Bhowmik chuan TMC hruaitu kut thlak a nih aṭanga darkar 42 hnuah pawh police-te chuan hma engmah an la lo tih sawiin, "Biplab Kumar-a'n ngen se chuan pawikhawihtute hi an man nghal ang, mahse a sawi loh chuan engmah an ti lo ang," a ti.

Party aiawhte hian sub-divisiona police officer Dr Ramesh Yadav an hmu nghal a, pawikhawihtute chu darkar 72 chhunga man chhuak ngei turin an ti a ni. Yadav chuan complaint an dawn angin FIR pawh Section 325 leh Arms Act hnuaiah an ziaklut tih a sawi a, CCTV footage-te pawhin enin, man chhuah ngei tumin hman an la niin a sawi.

TMC ṭhalai pawl hruaitu Santanu Sanha hi October 15 khan motorcycle-a chuang mi 5-6 velin an bei a, tunah hian Agartala-a GB Hospital-ah enkawl mek a ni.