BSF kutah NLFT commander a inpe

National Liberation Front of Tripura (NLFT) commander Jaiba Kaloi chu nimin zing khan Border Security Force (BSF)-te kutah a inpe.

Jaiba Kaloi hian kum 1998 khan NLFT (BM) (Biswamohan faction) hi zawmin, self-styled lieutenant a ni mek a ni. Nimin zing khan helpawl hi chhuahsanin, BSF kutah a inpe ta a ni.

BSF chuan NLFT a zawm aṭang hian Kaloi hian a nu leh pa pawh a hmu zui tawh lo tih sawiin, "Tunah chuan helna bansanin kawng dik a rawn zawh a, kum 23 chuang hnuah a nu leh pate nen pawh an inhmu leh thei dawn ta a ni,"an ti. Hel dangte pawh Kaloi thiltih chu entawn a, nunphung pangngai leh muanawm zawk thlang turin an sawm zui nghal bawk.

NLFT (BM) hel eng emaw zat chu BSF leh security force dang kutah an lo inpe tawh a ni.

Kum 2017 khan hel panga chu BSF Tripura kutah inpein, 2018-ah mi 12 an inpe a, 2019 leh 2020-ah mi pathum ve ve an inpe bawk. Kum 2017 aṭang khan NLFT hel hi 23 an inpe tawh a ni.