Biate i entawn ang u

Sorkar laipuia Ministry of Housing & Urban Affairs-in Swachh Bharat Mission (Urban) hnuaia India ram khawpui (city leh urban town)-te kum tina faina kawnga inelna, Swachh Survekshan a buatsaihah Biate khua chu Best City in Innovation & Best Practices - NE Zone Award dawng tura thlan a ni.

Mizorama khaw fai bera thlan tawh Biate hian lawmman dawn beisei vangin faina hi a kalpui a ni lo a, tun hma aṭang tawhin he khua hian faina beihpui hi an thlak tawh a, fai hi an nunpui a ni ber mai.

Mizorama khaw pakhatin faina kawnga heti taka hming an chher thei a nih ngai chuan, Mizorama khaw dangte pawhin an entawn thei ngei ang tih a chiang. Tun hnaiah Mizoram chhungah fai duhna a lian thar hle a, sorkar laipui lamin faina beihpui thlakin Swachh Bharat Mission an lo kalpui ve chiah bawk nen, faina kawngah hma kan sawn chak hle.

Hetihlai hian faina beihpui thlak tur hi chuan a thawha thawh chhuah mai hi a tawk lo a, tibawlhhlawhtu ni lo tura inzirtirna hi uar zawka kalpui zel a ngai. Faina beihpui thlak kawngah hian school zirlaibu aṭanga kalpui ṭan a ngai a, mipui nawlpuiin faina an nunpui theihna tur hian tun aia nasa zawka ke pen a la ṭul hle a ni.

Khaw pakhatin faina beihpui a thlak chu Mizoramah an lârpui tawh a, ram pum huap thlenga hmelhriat an lo ni ta hial mai. Biate pawhin an tih theih hi thingtlang khaw dang leh khawpui dangte pawhin an entawn thei a, fai tura inzirtirna hi tun aia nasa zawkin i kalpui zel ang u.