Assam : KMSS hruaitu Gogoi man

Assam-a RTI activist leh Krishak Mukti Sangram Samiti (KMSS) hruaitu ni bawk Akhil Gogoi chu Pathianni zing khan man a ni.

Akhil Gogoi hian kar hmasa khan Citizenship (Amendment) Bill, 2016 chu nasa taka an dodal thu sawiin BJP President Amit Shah-an Assam a tlawh hunah KMSS chuan flag dum nen an lo hmuah dawn thu a sawi a ni.

Amit Shah pawh hian nimin khan Guwahati hi a lo thlen beisei a ni a, he thu ziah lai hian chanchin hriat hman a ni lo thung a, Bharatiya Janata Party kaihhruai North East Democratic Alliance (NEDA) hruaitu hmarchhak hmun hrang hrang aṭanga kalkhawm te hmaah thu a sawi ang.

Gogoi hian kar hmasa khan BJP sorkar chu demin Citizenship (Amendment) Bill, 2016 an duh lohzia lantir nan BJP President zin tur chu flag dum nen an lo hmuah tur thu leh tharum thawhna erawh an thlen dawn loh thu a sawi a, mahse heti chung hian nimin zingah khan Srimanta Sankardeva Kalakshetra-ah Bill duh lohna lantirnaa a tel laiin Po­lice-te chuan an man a ni.

Gogoi chuan tharum tel miah loin Bill an duh lohzia an lantir thu leh heti chung pawha BJP in an man tho thu lakhran a nih hma in reporter-te hmaah a sawi a, mipuite chu Bill an duh lohna lantirna kawnga inpumkhat tura a duh thu leh BJP president chu flag dum lo vai khum tho turin a chah bawk.