Tripura-in sorkar hnaah Hmeichhe tan reservation siam dawn

Tripura sorkar chuan thu­chhuah siamin state chhungah hna lak danah kalphung thar an siam dawn thu sawiin sorkar hna laknaah hmeichhe tan reservarion an siam dawn tih an sawi.

Education leh Law Minister ni bawk Ratan Lal Nath chuan secretariat-a press conference-ah thu sawiin hna lak dan kalphung hman mek chu an thlauhthlak dawn thu a sawi a, hna lak dan langtlang zawk leh sorkar hnuaia dik taka hna lak a nih theih nan cabinet chuan hna lak dan kalphung thar an kalpui dawn thu a sawi a, hei hi thil pawimawh tak a nih thu a sawi a ni.

Ratan Lal Nath chuan induhsak bikna a awm tawh dawn loh thu leh department hrang hrangah a thiam ber ber leh a phu ber te chauh hna an lak tawh dawn thu a sawi a, policy tharah chuan thil dik taka tih a nih dawn thu a sawi.

Lal Nath chuan sorkar hma­sa, Left Front sorkar chu sawiselin hna an lak dan kawng­ah induhsakna a tam thu a sawi a, candidate quality an ngaihpawimawh loh thu a sawi bawk. Group C leh D hna an laknaah pawh written exam a awm tawh dawn thu a sawi a ni.

Nath chuan Home Depart­ment hnuaia hna laknaah pawh hmeichhe tan 10% reservation an siam dawn thu a sawi a, police hnuaiah hmeichhe tan reservation siam a la nih ngai loh thu leh cabinet chuan hmeichhe tana reservation siam tura thutlukna an siam tawh thu a sawi bawk.

Cabinet in hemi chung­changa meeting an neih hi Chief Minister Biplab Kumar Deb, home portfolio changtu ni bawk chuan a kaihruai a ni.