Guwahati-ah NEDA Conclave

North East Democratic Alliance (NEDA) chuan Pathianni khan Guwahati-a Srimanta Sankardeva Kalakshetra-ah conclave vawi thumna an nei a, he hunah hian BJP national President Amit Shah pawh lo kalin, hmarchhaka BJP kaihhruai sorkarna siamtu zinga mi pawimawh tak tak an fuankhawm.

Mizoram inthlan zawhah hmarchhak chu Congress-Mukt ni dawn : Amit Shah
Bharatiya Janata Party (BJP) national President Amit Shah chuan Mizoram in kum tawpa inthlanna an neih zawh hnuah chuan hmarchhak chu Congress awm lohna, ‘Congress-mukt’ a ni tawh dawn tih a sawi.

North East Democratic Alliance (NEDA) ten conclave vawi thumna an neihnaah hian thu sawiin hmarchhak biala Assam-ah a hmasa berin inthlanah hnehna an chan hnuah Manipur leh Tripura-ah pawh hnehna an chan leh thu a sawi a, heng state-ah te hian mipui ten an thlawp ṭha hle niin a sawi bawk.

Amit Shah chuan Nagaland leh Megha­laya-ah pawh NEDA leh BJP thlawpnain sorkarna siam mek a nih thu a sawi a, Mizoram-ah pawh Congress in hnehna an chan tawh dawn loh thu a sawi a, Mizoram inthlan zawh hnuah chuan hmarchhak chief minister pariat-te chu NEDA hnuaiah an ṭhukhawm tawh dawn a ni, a ti.

BJP President chuan tun hma chuan hmarchhak chu corruption vangin a lar thu a sawi a, mahse tunah chuan NEDA kaihhruaina hnuaiah rinphak bakah hmasawnna a neih tawh thu leh hmasawnna kawngah mel lung tam tak phum a ni tawh niin a sawi bawk.

Congress sorkar chu bei zuiin Amit Shah chuan Congress chief minister-te chuan Delhi, Mumbai leh Bengaluru-ah te bungalow te an neih thu sawiin heng neihna tur hian mi rethei te hmasawnna tur pawisa an hmansak a ni a ti a, BJP sorkar chuan sorkar laipui aṭanga pawisa lo kal reng reng chu a hmanna tur dik takah an hmang tih a sawi.

Conclave-ah hian hmarchhak state hrang hrang aṭangin NEDA aiawh Chief Minister, Deputy Chief Minister, MLA leh MP te bakah member dang te pawh an pungkhawm a ni.

Kalkhawm zinga langsar zualah hian Chief Minister Sarbananda Sonowal (Assam), Conrad Sangma (Meghalaya), Pema Khandu (Arunachal Pradesh), N. Biren Singh (Manipur), Neiphiu Rio (Nagaland), Biplab Kumar Deb (Tripura)-te an tel.

Amit Shah-an Assam a tlawh dawn hian Assam-a pawl pakhat Krishak Mukti Sangram Samiti (KMSS) te chuan Citizenship (Amendment) Bill 2016 an duh lohna lantir nan flag dum nena lo hmuah an tum a, hemi a nih avang hian KMSS hruaitu, RTI activist Akhil Gogoi chu Pathianni zing khan Police-te chuan an man a, a hnuah an chhuah leh nghal a ni.

Hetih lai hian KMSS hruaitu te leh thlawptute chuan Conclave neihna bulah hian flag dum te vaiin Citizenship (Amendment) Bill 2016 an duh lohna an lantir tho bawk.

Amit Shah chuan NEDA chuan Guwahati-ah regional office an din thuai dawn thu a sawi a, ṭhalai leh hmeichhe lam wing-te pawh din tura hmalak mek a nih thu a sawi a, hmarchhaka ṭhalaite chuan NEDA chu beiseina nen an thlir thu a sawi.

Pema Khandu thukhawchang
Arunachal Pradesh Chief Minister Pema Khandu pawhin thu sawiin hmarchhakaah chuan a hmain inhriatthiam loh tawnna a thleng ṭhin a, mahse tunah chuan NEDA kaihhruaina hnuaiah an buaina te an inhriatthiam tawn tawh thu a sawi a, Prime Minister Narendra Modi kaihhruaina hnuaiah hmarchhak chuan nasa taka hmasawnna a neih thu a sawi.

Khandu chuan Congress hunlai khan an ka chauha Look East Policy an sawi thu leh PM Modi hnuaiah chuan Act East Policy-a thlak a nih thu te, Southeast Asia ramte nen pawh inkalpawhna ṭha zawk neih zel a nih tawh thu a sawi bawk.

AP CM chuan PM Modi hnuaiah chuan Union Minister zanwg zawng te chuan hmarchhak an tlawh ngei ngei a ngaih thu sawiin harsatna an tawh te pawh a hmunah kalin an sawipui thei niin a sawi a ni.

Pema Khandu chuan Arunachal Pradesh pawhin hmasawnna nasa tak an hmuh thu sawiin “sea of change” an hmu hial niin a sawi bawk.

Narendra Modi kaihhruaina hnuaiah chuan kawngpui mai bakah thlawhtheihna leh rel hmanga inkalpawhna kawngah pawh hmasawnna an hmuh nasat thu a sawi a ni. Khandu chuan hetiang hruaitu ṭha neih a khat thu a sawi bawk a ni.

AGP President in citizenship bill dodal
Asom Gana Parishad (AGP) president leh Assam agriculture minister ni bawk Atul Bora chuan BJP President awm laiin Citizenship (Amendment) Bill, 2016 an duh loh thu a sawi.

Conclave-a thu a sawinaah Bora chuan bill chu ram leilung fa tan chuan thil hnawksak tak a nih thu a sawi a ni.

AGP President chuan AGP chuan bill chu a tir aṭanga an dodal thu leh Assam accord kalh a nih avanga an dodal thu a sawi. Assam accord chu kum ruk chhung tehmeuh Assam in buaina a tawh chinfelna leh mi 855 laiin nunna an chan phahna a nih thu a sawi a, chuvangin a hlut thu leh bill hian Accord hi a tihbuai dawn thu a sawi bawk.

Bora chuan dan loa ramchhunga lut te chu an sakhua avanga thliarhran ni lo se an duh thu a sawi bawk a ni. Minister chuan Prime Minister pawh an hmuh tawh thu leh Bill chungchanga an din hmun pawh chiang taka an hrilh tawh thu a sawi a ni.

Assam Agriculture Minister chuan a thusawi chu Amit Shah pawhin a hriatthiam an beisei thu sawiin Assam mipuite duhna puitlin tura a theihtawp chhuahpui turin a ngen a ni.

AGP hian a hma in thuchhuah lo siam tawhin Bill hi pawm a nih chuan ṭangrual sorkar aṭanga inhnuhdawhah sorkar an lo vau tawh bawk.