Nagaland State Congress-in NPF candidate thlawp chhunzawm dawn

Nagaland Pradesh Congress Committee (NPCC) president K. Therie chuan Thawhṭanni khan 2018 Lok Sabha by-election neih turah Naga People's Front (NPF) candidate C. Apok Jamir chu an thlawp chhunzawm tur thu a sawi.

Congress chuan Lok Sabha inthlan neih turah hian candidate an neih ve loh thu sawiin May 28-a inthlanna neih hunah pawh NPF candidate hi an thlawp dawn thu a sawi a ni.

NPCC president chuan secular force zawng zawng te chu communal force do letna kawngah an inthurual a ṭul thu a sawi bawk.

Therie chuan Lok Sabha by-election neih tur pawh hi political ideology pahnih, communalism leh secularism inbeihna a nih thu a sawi a, communalism chu sorkar in Hindutva a kalpui a sawina a nih thu sawiin BJP thupui ber a nih thu a sawi a, BJP chuan community zawng zawng chu Hinduism hnuaia kuntir vek an tum thu a sawi.

India ram chu sakhaw hrang hrang leh hnam tihdan phung hrang hrang nei awmkhawmna a nih thu a sawi a, hetiang chiah hian Naga mipuite pawhin danglamna an neih thu sawiin an sakhua, hnam tihdan phung leh an thil chin ṭhinte chu special provision of Article 371 (A) hnuaiah venhim tlat a nih thu a sawi bawk.

Therie chuan BJP chuan Con­sti­tution hnuaia special provision zawng zawng hi paihbo vek an tum niin a sawi a, BJP chuan an duh a nih phawt chuan anmahni sakhua chu an humin an veng thei a, mahse sakhaw dang leh hnam tihdan phung hran neite chu an tibuai tur a ni lo, a ti.

Secularism chung­chang pawh sawiin NPCC president chuan secularism chu ama ngaihdanah chuan duh duh sakhua leh zirtirna pawm theihna a nih thu sawiin, communalism chu hemi letling chiah hi a nih thu a sawi bawk.

BJP leh NDPP chuan mipuite lakah engmah thu an tiamsak pawh a hriat loh thu leh election manifesto an tarlan lai pawh a hriat loh thu a sawi bawk a ni.

BJP leh NDPP ṭangrual sorkar PDA chuan 2019 inthlanpuiah hnehna an chan tawh dawn loh thu a sawi bawk.

Therie chuan vote chuan Nagaland-a Hindutva chawisanna tur leh chawisan lohna turah thil a tithei tih sawiin Nagaland mipuite chuan pawi khawih loh se a duh thu a sawi bawk a, Juda Iskariot-a dinhmuna din reng chu a hun tawh lo tih a sawi bawk a ni.